Në zyrat e Këshillit Prokurorial të Kosovës (KPK), ka përfunduar procesi i intervistimit të pesë kandidatëve për Kryeprokuror të Shtetit.

Në garë për të marrë besimin e anëtarëve të KPK-së për këtë pozitë janë: Blerim Isufaj, ish-kryesues i KPK-së dhe aktualisht kryeprokuror i Prokurorisë Speciale të Republikës së Kosovës (PSRK), Kujtim Munishi, kryeprokuror i Prokurorisë Themelore në Prishtinë, Armend Hamiti, prokurori i Krimeve të Rënda në Prokurorinë Themelore në Prishtinë, si dhe Lulzim Sylejmani e Shqipdon Fazliu, të dy prokurorë në Zyrën e Kryeprokurorit të Shtetit.

Pas përfundimit të intervistimit, pritet që anëtarët e komisionit të japin rezultatet për kandidatët.

Pjesë e komisionit rekrutues për përzgjedhjen e Kryeprokurorit të Shtetit janë: Jetish Maloku- kryesues, Arjana Shajkovci, Bedrije Syla- Alshiqi, Armend Zenelaj dhe Jovo Radoviq.

Ndryshe, më 17 mars KPK ka publikuar konceptdokumentet e kandidatëve, në të cilat të njëjtit kanë paraqitur vizionin e tyre nëse do të zgjedhën në këtë pozitë.

Kurse, në takimin e 210-të ky Këshill ka marrë vendim që intervistat e kandidatëve për Kryeprokuror të Shtetit të incizohen nga mediat dhe transmetimi i tyre të bëhet pas përfundimit të procesit./Betimipërdrejtësi/